主題一：快樂是什麼？(快樂是啥物?) 今仔日，《心花若開》欲用音樂來揣「快樂」的面貌。有人講，快樂是唱歌跳舞，有人講是家庭平安，嘛有人講，是心內彼个輕鬆的笑容。節目一開始，先用龍飄飄〈快樂的歌〉——馬來西亞囡仔遊戲的節奏，𤆬咱轉去童年的歡喜時。 閣來，電影【大囍臨門】主題曲〈歡喜來恰恰〉，用人情的熱鬧感，予心情開闊快樂起來。陳雷〈歡喜就好〉提醒咱：做人免siunn計較，歡喜就好。林琇琪〈好運連連〉用廟會的熱鬧唱出祈福佮希望。 愛情若是離開矣！李聖傑〈你們要快樂〉講的是成全；最後由李千娜〈心花開〉帶來青春戀愛的甜。 原來，快樂無複雜——一句感謝、一首歌，就予咱心花開開開~ 主題二：台語懷念老歌—羅一良(1)「離別場景 × 思念情懷」 今仔日，咱欲用羅一良老師的歌聲，𤆬逐家轉去彼个1960年代的台語抒情歌年代。羅一良的歌聲溫柔、穩紮，講的是離別、思念，用火車站、港口、夜都市的風景，唱出心內的鹹酸苦汫。 節目內容有〈哀愁的火車站〉，月台的風雨拍甲心攏冷；〈哀愁公路車站〉是黃昏送別，車聲佮黃昏引起依依難捨的心情；〈黃昏思鄉〉唱遊子，人在異鄉、心在故鄉。〈離別的乾杯〉用燒酒來送情，苦中帶悲情；〈離別的港口〉輕聲細膩，有離別的心痛，嘛有重逢的向望。