主題一：一支麥克風，唱盡人生悲歡——KTV經典台語情歌 一支麥克風，唱得出親情的思念，也唱得出人生的悲歡離合。本集《心花若開》精選五首經典不敗的KTV台語金曲：江蕙〈落雨聲〉，唱出離鄉遊子對故鄉佮親人的掛念；黃乙玲〈人生的歌〉，唱盡人生的起落佮體會；翁立友〈送行〉，描寫感情行到盡頭時，孤單送別的心情；王識賢、孫淑媚〈雲中月圓〉，以深情對唱交換愛的約束；施文彬〈再會啦！心愛的無緣的人〉，則唱出明明相愛，煞不得不放手的無奈。這寡熟似的旋律，毋但是KTV點唱簿內的熱門歌曲，也陪伴一代閣一代的人，唱出平常時仔講袂出口的心聲。歡迎綴阿娟做伙，用歌聲回味生命中的思念、相愛佮離別。 主題二：日語旋律，台語心聲——翻唱歌的島嶼歲月（2） 一條旋律漂洋過海，換做台語演唱，生湠出屬於臺灣的故事。本集《心花若開》延續「日語旋律，台語心聲」系列，透過四組日、台歌曲對照，聽見翻唱歌的島嶼歲月。對〈浪花節だよ人生は〉到〈望月想愛人〉，月娘寄託著等待的心情；〈すずらん馬車〉來到臺灣，化做載著離鄉憂愁的〈流浪的馬車〉；〈長崎の蝶々さん〉翻唱成〈長崎蝴蝶姑娘〉，留下港邊的異國戀情；〈別れの入場券〉以〈離別的月台票〉，唱出火車開走去以後，袂赴講出喙的再會。日語旋律猶原熟似，台語作詞人煞重新安排人物、場景佮感情，寫出臺灣人的思念、漂浪、等待佮離別，也見證臺灣流行音樂吸收外來文化、創造家己聲音的過程。