::::::
心花若開
主持人黃莉娟（阿娟）
本集主題
主題一：兩種語言，仝款深情——華台語男女對唱情歌//
主題二：寶島歌王葉啟田——內山青春戀歌
本集內容
主題一：兩種語言，一款深情——華台語男女對唱情歌
華語佮台語，聲調無仝、語氣無仝，囥佇仝一首情歌內底，煞親像一對男女，用兩種語言講出一段感情的兩爿。本集《心花若開》精選四首華台語男女對唱情歌：〈天地問相思〉唱出分隔兩地、放袂落的思念；〈作陣飛〉描寫為著對方的前途，暫時放手的體諒；〈山頂的春天〉帶來風雨中互相了解、陪伴佮守護的溫暖；〈落花淚〉則唱出青春漸逝、情緣難留的人生感慨。華語的含蓄、台語的深情，佇男女聲交會之間互相回答、互相補充。兩種語言，唱的是仝一款愛；兩个人的聲音，講的是相思、成全和珍惜。
主題二：寶島歌王葉啟田——內山青春戀歌
一九六○年代，少年葉啟田以〈內山兄哥〉踏入歌壇，輕快活潑的歌聲，唱出農村青年初到都市的驚奇，也為「寶島歌王」的歌唱歲月掀開序幕。隨後推出的〈內山姑娘〉、〈內山姑娘要出嫁〉佮〈內山姑娘嫁了後〉，將內山男女的青春情事一段一段唱落去，親像一齣用歌聲演出的鄉土連續劇。對初識的純情、戀愛的期待，到花轎遠去、追愛無成的心酸，熱鬧的節奏內底，有深深的毋甘佮失落。本集《心花若開》，欲陪逐家重溫葉啟田的「內山系列」，聽見昔日臺灣農村的生活風景、青年對都市的憧憬，以及一段有笑、有夢、嘛有目屎的青春戀歌。
LIVE