主題一：舊旋律的新生命——流行音樂中的取樣創作 一段熟似的旋律，經過重新編曲、填詞佮創意轉化，就可能展現出全新的音樂生命。 本集《心花若開》以「取樣、引用佮改編」為主題，𤆬領聽眾對西洋搖滾、巴洛克古典樂、華語經典情歌，一路聽到臺語流行歌曲佮現代饒舌創作。感受經典旋律跨越語言、曲風佮世代的多元面貌。 聽見老歌旋律如何化做九○年代的深情記持。經典毋是停留佇過去，當創作者加入新的感情佮時代聲音，舊旋律就會重新活起來，繼續感動一代閣一代的聽眾。 主題二：唱予人笑，嘛唱予人想——劉福助的嘻哈勸世歌 臺灣民謠歌王劉福助，人稱「小劉哥」。伊將傳統唸歌、臺灣民謠佮現代饒舌結合做伙，用輕快的節奏、幽默的語言，唱出家庭倫理、環境保護、惜食觀念佮交通安全等重要議題。歌聲聽起來真鬧熱，歌詞笑詼閣好記；毋過，笑聲的背後，攏藏著對社會深深的關懷。 下集《心花若開》精選劉福助2025年的四首嘻哈勸世歌：〈爸母年老〉提醒咱孝順愛及時，用耐心陪伴漸漸老去的爸母；〈大自然的反撲〉唱出氣候變遷佮生態破壞的警訊，呼籲逐家共同守護地球；〈粒粒流汗苦〉描寫農漁民看天食飯的辛勞，教咱珍惜每一口得來不易的食物；〈酒後不開車〉則用鬧熱、幽默的說唱，宣導「啉酒毋駛車，駛車毋啉酒」，守護每一个人的生命安全。 四首歌、四項生活提醒，攏指向仝一个核心——「珍惜」。珍惜爸母、珍惜環境、珍惜食物，也珍惜家己佮別人的性命。邀請您做伙來聽劉福助按怎唱予人笑、嘛唱予人想，予勸世歌毋若是講道理，閣會當成做改變生活的一份力量。