主題一：舊聲新唱，島嶼入歌——取樣、創新與臺灣生活聲景 一段老歌、一條民謠、一句生活中的對話，經過創作者的巧思，攏可能成做一首新歌的起點。 本集《心花若開》以「取樣、創新與臺灣生活聲景」為主軸，𤆬領聽眾對許霈文、周星瀚取樣文夏經典旋律的〈故鄉的黃昏〉出發，聽見老歌的呼叫走入現代城市；黃明志、大支的〈鬼島〉，透過反諷、族群吟唱佮台語饒舌，唱出對臺灣社會的批判、疼惜佮期待。節目嘛透過徐佳瑩〈出口〉，聽見宜蘭民謠〈丟丟銅仔〉化做人行過生命磅空的勇氣。五月天〈垃圾車〉以日常物件比喻朋友之間的陪伴；黑名單工作室〈計程車〉則用台語饒舌佮生動口白，記錄一九八九年臺北街頭的交通、勞動佮市井人生。五首無仝年代、無仝曲風的作品，攏用音樂記錄咱生活的土地。當當老旋律、民間歌謠、族群聲音佮城市日常進入新的創作，臺灣人的記持、感情佮生活風景，也佇歌聲當中一代一代流傳落來。 主題二：歌聲唱盡女性心事——方瑞娥經典懷念金曲 一首老歌，會當陪伴咱行過一段人生；一个深情的歌聲，也會當替一个時代的女性，唱出𪜶講袂出喙的心事。 本集《心花若開》精選方瑞娥七首經典台語懷念金曲。對〈黑玫瑰〉離鄉漂泊、受盡感情風雨的女性命運，聽到〈歌壇〉華麗舞台背後，歌手四界奔波、滿腹心酸的真實人生；〈中山北路行七擺〉描寫受家庭阻礙、最後無法度做伙的初戀，〈風中燈〉則將一段搖搖欲熄的感情，唱甲深沉閣傷心。透過〈廟前的戀情〉，聽見女性對愛情誓言的堅持佮等待；閣由〈最後的火車站〉、〈最後的一封信〉，唱出月台送別、批信告別，以及感情行到盡磅時的毋願佮無奈。 這寡歌曲唱的是愛情，也是女性的人生。歌中的女性有期待、有失望，有目屎，也有面對命運的勇氣。方瑞娥以深情厚實、充滿感情重量的歌聲，替𪜶唱出離鄉、漂泊、等待、失戀佮告別的心情，也為一个時代的女性故事，留下予人感動的聲音。