主題一：「台語現代詩 × 流行金曲」 台語歌除了好聽，背後攏有詩人的靈魂。路寒袖講過：「詩佮歌，是做伙出世的。」伊用台語寫詩、寫歌，欲突破悲情模式，予台語流行音樂有新的氣味。潘麗麗的〈畫眉〉，詩意媠甲像山林；閣有鳳飛飛〈寫佇雲頂的名〉、〈思念的歌〉，用雲、水、山勢來寫一段情、一份鄉愁。〈風雲飛過全台灣的厝頂〉嘛用都市的青紅燈、火車聲，唱出台北的孤單和漂泊。 這幾首歌，攏是詩，嘛是歌；一句詩文，一條旋律，就會變成心內的風景。台語詩歌，寫愛情、寫人生、寫故鄉，嘛寫咱台灣人的靈魂。希望透過今仔日的節目，逐家攏聽著台語詩歌的美。 主題二：「戀愛百景：對初戀甜到心頭酸」 今仔日《心花若開》繼續來欣賞羅一良老師「愛情篇」的經典歌曲。羅一良的聲音，溫柔又厚實；有時甜、有時酸，親像人生的戀愛百景。這集的主題是「戀愛百景：對初戀甜到心頭酸」，用七首歌來看愛情的面貌。〈可愛的彼个姑娘〉有初戀的閉思佮甜蜜；〈天下第一愛〉是歡喜甲會笑出來的對唱情歌。〈情網〉親像一齣人生的戲，講男女之間的誤會佮憐惜；〈難忘的春夢〉講的是失戀了後欲放閣放袂離的心情。〈定情的傷痕〉用一條辛酸的傷痕，記錄對戀人的深情；〈為情為愛〉唱癡情男子佇夜雨中心內毋甘願的等待；〈失去的小雲雀〉溫柔哀愁，講失去愛情，歌猶佇心肝內唱袂煞。這幾首歌，攏是舊式的情深，嘛是真實的人心。