主題一：青春換新聲——年輕人愛聽的台語歌 新世代的台語歌，已經行出傳統悲情曲風，加入搖滾、民謠佮輕快節奏，唱出少年人的愛情、生活佮人生態度。這集《心花若開》精選黃奇斌〈若無你我欲去佗位〉、邱軍〈運轉人生〉、茄子蛋〈愛情你比我想的閣較偉大〉、琳誼〈蚵仔麵線〉，以及蘇明淵〈朋友一大拖攏結婚啦〉。五首歌，有失去摯愛的思念、小人物為生活拍拚的堅持，也有轟轟烈烈的愛情、平凡相伴的幸福佮現代單身者的心聲。語言嘛會綴時代不斷成長；少年人願意用台語創作、演唱，正是予母語延續生命力的重要力量。歡迎綴阿娟做伙來聽，新世代按怎用青春的旋律，唱出屬於這个時代的台語心聲。 主題二：日語旋律，台語心聲——翻唱歌的島嶼歲月(1) 一條旋律飛過海洋，換一種語言、落佇一片新的土地，生湠出無仝的故事。本集《心花若開》精選五首由日本歌謠重新填詞的經典台語歌：林峰〈舊皮箱的流浪兒〉、羅一良〈哀愁的火車站〉、林英美〈夜港邊〉、顏華〈港町十三番地〉，以及陳盈潔、羅時豐〈台北今夜冷清清〉。咱綴歌聲，對一跤舊皮箱出發，行過送別的火車站、等待的夜港、繁華的港町，最後來到孤單的臺北暗暝。這寡作品並毋是干焦將日語翻譯做台語，這是台語作詞人重新安排人物、場景佮故事，共臺灣人離鄉、拍拚、漂浪佮失戀的生命經驗寫入歌曲中。日語旋律來到臺灣，經過台語重新生湠，成做陪伴一代閣一代的島嶼之歌。